Screening fyri lívmóðurhálskrabba
Allar kvinnur í aldrinum 23–64 ár fáa bjóðað regluliga, ókeypis screening fyri lívmóðurhálskrabba. Endamálið er at finna HPV-smittu og kyknubroytingar, áðrenn tær møguliga menna seg til krabbamein.
-
23–29 ár: Kanning fyri kyknubroytingar 3. hvørt ár.
-
30–64 ár: Kanning fyri HPV-virus 5. hvørt ár.
Tú fært innkalling frá Landssjúkrahúsinum, tá tíð er til kanning. Síðani skalt tú sjálv biðja um tíð í viðtaluni.
Kanningin verður gjørd av lækna ella sjúkrarøktarfrøðingi, sum er upplærd í kanningini. Tað er ein vanlig undirlívskanning, har ein lítil roynd verður tikin frá lívmóðurhálsinum. Royndin verður síðani send til Danmarkar.
Tú skalt sjálv biðja um svar við at ringja ella skriva umvegis heimasíðuna umleið 2–3 vikur eftir kanningina.
Vísir kanningin HPV-smittu ella kyknubroytingar, kann tað verða neyðugt við nýggjari roynd ella víðari kanning á Landssjúkrahúsinum. HPV-smitta er vanlig og merkir ikki, at tú hevur krabbamein.
Hóast tú ert HPV-koppsett, skalt tú framvegis til screening. Koppsetingin verjir væl, men ikki móti øllum sløgum av HPV, sum kunnu elva til krabbamein.
Screening er ætlað kvinnum, sum ikki hava sjúkueyðkenni. Hevur tú óvanliga bløðing, bløðing eftir samlegu ella eftir skiftisárini, skalt tú bíleggja tíð hjá lækna og ikki bíða eftir næstu screening.
Hent at vita
- Evni | Kvinnur
- Leinki | Kunning um screening fyri lívmóðurhálskrabba







